2Th 2 | MHL | STEP | Aria emar unowik, yiena Maneka Yeesus Krais nainiw ekapep i unowiya yia fiirimeya o miir onoma-pa wiar ikowa nain, i feenap mau naep.

2 Thessalonians 2

Mua samor akena nain ikoka imenarinon

1 Aria emar unowik, yiena Maneka Yeesus Krais nainiw ekapep i unowiya yia fiirimeya o miir onoma-pa wiar ikowa nain, i feenap mau naep. 2 I feenap niar miimamik, mua papako-ke maimik, “I Ewar Eliwa-ke kema yiek nain feenap, Yeesus Krais ekapowa epa aakisa fanek.” Ne papako-ke maimik, “Pol ame pun parosifa-pa naap maemik.” Ne oko pun, “Wi mua-ke Mua Maneka opora yia wafuromami naap maimik.” Naap nia maakiwkin-na miimap me soraneka, ne kema me tootoneka. 3 Wi naap nia momorimik nain opora me wiar miimeka. Epa nain eewuar ikua. Sira fain kiikir imenarinon. Feenap, mua unow akena emina kekan-afurap Mua Maneka mikikira iwikuan. Ne mua eena Mua Maneka sira iiwawun wiar fieniya nain pun ariman arinon. O ikoka epa samora neek ikok sirirowa maneka aawem-ikowa nain-ke. 4 Os-ke yo yaisow naemi wi inasina unowa wia maemi wia farimik nain iinan wia irami wame pirinon, ne Mua Maneka unuma pun naap porainon. Neemi Mua Maneka tempel koora wiar ikiwep o epa neeke wiar pokap ikok mainon, “Yo Iinan Mua Maneka-ke,” naap wame mainon.

5 Yo iiriw niamiya ikok maa unowa nain nia maakem-ikem. Ni nain me kema suuwiman-i? 6 Ne ni fain pun amisareman, aakisa maa oko-ke mua samora imenarowa era wiar puukap ikua. Ikoka ona epa eena Mua Maneka wuomak nain pepek ereya o ariman arinon. 7 Ne aakisa Mua Maneka opora iiwawun wiar fienow sira nain-ke kokot uuwam-ikaiya, nain ewur me ariman arinon. Mua Maneka-ke mua eena era wiar puukap ikua nain epa wue naakeya sira nain manekaremi epa unowa fiifinarinon. 8 Iir nain akena mua samora nain ariman arinon. Naap ikaeya yiena Maneka Yeesus-ke oromi ona opaimik yoowa-pa ifakiminon. Ona parin maneka nain-pa o iiwawun samorami weeser-wuinon.

9 Aria mua eena Mua Maneka opora iiwawun fieniya nain Satan kekanowa onaiya ekapinon. Ekapemi kekanowa wia ofakowami maa miililina sira-sira oninon. Ne wia peeskimemi maa sira onaiya akena nain onami kema wia mikinon. 10 Wi mua eena opor makena ookowa miatinep Mua Maneka wameiya eliwa ikowa nain wiena sisina-pa wiam wuamik. Naapeya wi umep mesenalowa-ke. Ne mua nain-ke wadol sira-sira onami wi mua nain wia peeskimemi wia momorinon. 11 Wi opor makena miimowa miatinep sira samora onowa kema nain manekiw ikemik. Naapeya Mua Maneka-ke kema wiar iiwkeya opor wadola nain makena-ke naep ook-ikiwem-ikemik. Naeya wiena pina neeke wia mekawami wia samorinon.

13 Emar unowik, ni Mua Maneka nia kookaliya nain-ke. O nia aawowa naep mokomokoka nia nanikak, naeya Ewar Eliwa-ke nia baliweya ni kema dubil maneka ikok opor makena ookami anane eliw ikowen. Naapeya i ni muuta nain anane Mua Maneka sira eliwa naakem-ikowa-ke. 14 Os-ke yiena Maneka Yeesus Krais parina ne kekanowa-pa wiar ikeka naep nia farek. Naeya i Yeesus opor eliwa nia maakemkun ni opiwkin nia aawep ona teeria-pa nia wuak.

15 Naapeya emar unowik, ni kekanep opor makena yiena kakeniw opaimika-pa nia maakemik nain, ne parosifa-pa nia maakimik nain opa-afureka.

16 Mua Maneka yiena Auwa eena yia kemalep kema yia iikirowam-ikaeya maa ikoka imenarowa nain kemaiw ikok makena yia opominon naimik. Naeya i o faremi feenap nia naimik, yiena Maneka Yeesus Krais ne yiena Auwa Mua Maneka ikos nia kekanowami kema nia iikirowiwkin ni opor eliwiw niam maakemi sira eliwa-pa niam aawem-ikeka.